سواءا كنتو من محبي السباقات في الطبيعة ولا على الطريق
و طلعتو الجبال من الشمال، و شبعتو ب تراب الصحراء من الجنوب
و جربتو جميع أنواع المسافات على الطريق
لكن مازلتو تلوجو على السباق اللي يختبر أبعد نقطة من قدرتكم الجسدية و الذهنية

من صفاقس، بلاد الخير و البركة، تجيكم الفرصة اللي تستناو فيها
و موش أي فرصة، هي تجربة فريدة من نوعها و الأولى في تونس
حيث تنظّم جمعية "Run In Sfax"
سباق الترايل بعنوان "Phœnix Running Challenge"
و اللي سيقام إنشاء اللّه يوم السبت 21 جانفي 2023
في قرية الشفار من معتمدية المحرس بولاية صفاقس

ترفعو التحدي!؟

سباقنا مافيهيش أحسن وقت باش تكون الفائز، لكن يلزمك تكون وصلت قبل ساعة باش تعاود الدورة اللي بعدها على مدى 12 ساعة
باش نسهلوها عليكم، قواعد السباق ساهلة برشا
السباق يتمثّل في دورة وحدة طولها 7كلم فيها الأرضية الترابية، الشط و البحر، الرمل و الغابة
لازمك تكمّل الدورة في أقل من ساعة باش تنجّم تواصل في السباق و تبدى الدورة اللي بعدها
المتسابق اللي يكمل الدورة بعد الساعة، ياخذ الميدالية و ماينجمش يواصل السباق
إذا كان ناخذو على سبيل المثال انك كملت الدورة في 45 دقيقة، يلزم
تقعد ترتاح 15 دقيقة، إلى أن تكمل الساعة باش تنجم تبدى مع باقي المتسابقين الدورة اللي بعدها

ترفع التحدي!؟

يلزمك تعمل عل القليلة دورة وحدة في أقل من ساعة باش تكون "Finisher"
نقطة الانطلاق هي نفسها نقطة الوصول بحكم إنو السباق على شكل "boucle"
السباق يمتد على 12 ساعة، معناها كل متسابق ينجم يجري
معانا 12 دورة، و بالطبيعة كل دورة بساعة وحدة
بعد ماكملنا 11 دورة، و وصلنا بأكثر من متسابق في الدورة رقم 12، الرابحين بصفة رسمية في السباق هوما اللي باش يوصلو الأولين في الدورة الأخيرة في الأصناف متاعهم و يكونوا أبطال النسخة الأولى

كمنظمين، كل متسابق تحدى الخوف و القيود و خرج من خط الانطلاق و كمل ولو دورة وحدة هو فائز و يستحق ميدالية بكل جدارة

!ترفع الرهان و تقبل تتحدى قيودك؟

مستعد باش تتخطى الحدود اللي تعرفهم على روحك و تنجم تجري أكثر من 80 كلم في 12 ساعة؟!
بلاصتك من أبطال الفانيكس تستنى فيك

للمشاركة معانا، عنا 2 أنواع من الدوسارات
الأول يتمثل في دوسار الفينيكس، و اللي يخوّلك باش تشارك معانا في 12 دورة كاملين
سعر المشاركة: 50 دينار
الثاني يتمثل في دوسار الاكتشاف، و اللي يعطيك الفرصة باش تشارك في 3 دوراة فقط باش تكتشف السباق و تعيش التجربة الجديدة معانا.
سعر المشاركة: 20 دينار

كل متسابق باش يكمل معانا دورة وحدة، باش يربح ميدالية مهما يكون الدوسار اللي خذاه

بالنسبة للفائزين من العنصر الرجالي أو النسائي باش يكونو فمّا برشا جوائز في انتظاركم

إنشاء الله، التسجيل للسباق يبدى من أول شهر ديسمبر، المطلوب حاليا حضّرو رواحكم ليوم 21 جانفي لخوض سباق التحدي في الشفار من ولاية صفاقس

ماتخلّي حد يقلّك انك تنجّم تجري كان ثلاثة ولا خمسة ولا ثمنية دوراة، حتى و لو كان الشخص هذا انتي هو!! إذا كان عندك حلمة باش توصل للدورة رقم 12، أجري عليها و حققها و احميها من أي انسان ينجّم يبعدك عليها

ولازم تعرف أنو سباقك الحقيقي يبدأ، وقت اللي يبدأ في بالك وصلت و كملت

لخوض التجربة، ماعليك كان تكون واقف على خط الانطلاق مع الأبطال كل ساعة في
"Phoenix Running Challenge"
Dépassez Vos Limites

لمزيد من المعلومات تنجمو تتصلو على الأرقام هذه
58 127 376
24 726 462